// ARABAKO GOLF FEDERAZIOA
Arabako Golf Federazioko Zuzendaritza Batzordea
Lehendakaria:
Aitor Gorospe Garcia de Albeniz
Lehendakariordea:
Iñigo Bilbao Madariaga
Diruzaina:
Alvaro Ugarte Gomez
Idazkaria:
María Juncal Vadillo Crespo
Batzordekidea eta kirolarien ordezkaria :
Maria Rosa Alonso Diez
Batzordekidea eta haur kirolarien ordezkaria :
Endika Gorospe Elorza
Batzordekidea eta klubetako ordezkaria:
Lola Morales Lage
Batzorkidea eta epaileen ordezkaria:
Jose Manuel Martinez Dominguez
Batzorkidea eta teknikarien ordezkaria:
Philippe Kerivel
Arabako Golf Federazioaren estatutuak
1. artikulua
Arabako Golf Federazioa irabazteko xederik gabeko entitatea da. Nortasun juridikoa eta jarduteko ahalmena du, eta kirolariak, teknikariak, epaileak, kirol klubak eta elkarteak eta beste entitate batzuk biltzen ditu bere baitan, Arabako Lurralde Historikoan golfaren eta Pitch & Puttaren jarduna praktikatzeko, sustatzeko eta antolatzeko.
2. artikulua
Federazio honek lege-arau hauek ditu gidari: 2023ko martxoaren 30eko 2/2023 Legea, Euskadiko jarduera fisikoarena eta kirolarena; 2006ko urtarrilaren 31ko 16/2006 Dekretua, Euskadiko kirol federazioena; 2024ko urriaren 22ko Agindua, Kultura eta Hizkuntza Politikako sailburuarena, EAEko eta lurraldeetako kirol-federazioen hauteskunde-erregelamenduak prestatzeko eta hauteskundeak egiteko irizpideak finkatzen dituena, eta gainerako erregelamenduzko xedapenak; estatutu hauek; berariaz prestatutako araudiak; eta bere organoek baliotasunez hartutako erabakiak.
3. artikulua
Helbide honetan du egoitza Federazio honek: Amadeo Garcia de Salazar plaza, z/g, (Kirol Federazioak), Gasteiz, 01007 PK (Araba).
4. artikulua
Federazio honek Arabako Lurralde Historikoko golf jarduera eta lehiaketa ofizialak, diziplina ezberdinetakoak, sustatu, kalifikatu, baimendu, zuzendu eta antolatzen ditu, eta jolas izaerako kirol praktika bultzatzen du.
5. artikulua
1. Federazio hau Euskadiko Golf Federazioko kide da.
2. Federazio honek bere modalitateari dagokion Arabako kirol federatua ordezkatzen du Euskal Autonomia Erkidegoan.
6. artikulua
Bere helburuak lortzeko, eginkizun hauek beteko ditu Federazioak:
a) Kirol jarduera federatua antolatzea bere lurralde eremuan.
b) Golf kirol-modalitateko lehiaketa ofizialak eta jarduerak antolatzea Arabako lurralde historikoan.
c) Parte hartzeko eta lehiatzeko bere arauak ezartzea, nahiz eta behar denean lurralde eremu zabalagoko federazioek emandako arauak ere bete beharko dituen.
d) Golf modalitateko ordezkaria izatea EAE mailan.
e) Federazioaren golf baimenak tramitatzea, gero Euskadiko Golf Federazioak baimen horiek eman ditzan, azken horrek ezarritako betebeharrei eta prozedurari jarraiki.
f) Bere jarduera aurrera eramaterakoan sortzen diren kirol gatazken berri jakitea eta haiek ebaztea, organo judizialen eta arbitralen eskumenaren kaltetan izan gabe.
g) Bere arauak betearaztea eta diziplinako ahalmena haien arabera erabiltzea.
h) Dopinaren aurkako borrokan eskumena duten erakundeekin lankidetzan aritzea, Euskal Autonomia Erkidegoko Kiroleko Dopinaren aurkako ekainaren 21eko 12/2012 Legearekin eta aplikatzekoa den estatuko eta nazioarteko araudiarekin bat etorriz.
i) Golf kirol-modalitateko teknikariak eta epaileak prestatzen laguntzea, helburu horrekin xedatutako araudiaren arabera.
j) Bere diru baliabideak zertarako erabili eta nola banatu erabakitzea; bere jarduera aurrera eramateko beste erakunde batzuek eskualdatzen dizkioten baliabideak kudeatzea, eta bere baliabide guztiak zuzen erabiltzen direla zaintzea.
k) Kide dituen klub eta taldeei agian emango dizkien dirulaguntzak izendatzea eta kontrolatzea.
l) EAEko administrazioekin batera elkarlanean aritzea kirola bultzatzeko bere helburuak betetzerakoan, eta bereziki, martxoaren 30eko 2/2023 Legeak federazioei zuzenean ematen dizkien lankidetza eta aholkularitza eginkizunetan.
m) Kirolari buruzko bere estatutuak eta araudiak prestatzea.
n) Dagokion lurralde-eremuan eta bere kirol-modalitatean emakumeen eta gizonen arteko berdintasuna sustatzea eta, ahal den neurrian, bermatzea.
o) Eta, oro har, bere kirol-modalitatean aritzea bultzatzeko eta hobetzeko egokia den guztia xedatzea.
7. artikulua
1. Federazio honek Euskadiko Golf Federazioarekin eta, hala dagokionean, Euskadiko Federazioan integratutako beste federazioekin koordinatuta beteko ditu bere eginkizunak.
2. Federazio hau Arabako Foru Aldundiarekin lankidetzan jardungo da eta lankidetza-hitzarmenak sinatu ahal izango dira bien artean, helburuak, kirol programak, aurrekontuak eta eskuordetutako funtzio publikoekin zerikusi zuzena duten gainerako alderdiak zehazteko xedez. Hitzarmen horien izaera juridiko-administratiboa izango da. Era berean, Federazio honek kontratu-programak sinatu ahal izango ditu Arabako Foru Aldundiarekin; horietan, gutxienez, programak finantzatzeko aurreikuspenak, lortu beharreko helburu zehatzak edo kuantifikagarriak eta helburu horiek ebaluatzeko eta ikuskatzeko mekanismoak adierazi beharko dira.
8. artikulua
Federazio honen barruan ez da utziko inori bereizkeriarik egiten arrazagatik, sexuagatik, erlijioagatik, iritzi eta sinesmenengatik, edota beste edozein egoera pertsonal nahiz sozialengatik.
